طعنة قفا

البلى ماهو في طعنات الـذي صـدّر طعونـه
أهـون لقلبـي يصدّرهـا و لا يطعـن خـفـا
البلى في طعنة اللي تحلـف بصدقـه عيونـه
يفتح يدينه .. و يحضني .. و يطعنهـا قفـا !!
ما وعيـت إلا و طعنـات الخناجـر يسألونـه
منهو علّمْه الرمايه .. قبـل اعلّمْـه الوفـا ؟!
ظل ساكت .. ينظر لدمي و حط الرجل دونـه
و انحنى يقطف شبابي من ضلوعي .. و اختفى
خيّب ظنوني جعل ربـي يخيـب لـه ظنونـه
ما هقيته يحرق انفاسـي و انـا اطلبـه الدفـا
عشت له (كفٍ ) ليا جا ينهـدم شـدّت متونـه
لعنبو دمّه .. قطعنـي قبـل اشيلـه و انكفـى
خانني .. و اللي فرض حبه على قلبي لخونـه
و اكسره ليمن تصيح الرحمه بوجهي : كفى !!
له على جرحي ديون و جيت اسدد له ديونـه
و أحفر اخلاصـي لطعناتـه بسكيـن الجفـا
حالفٍ دمعي و غصاّت الجراح إن يخسرونـه
ما على امثاله و ربي لو خسرناهـم .. أفـا !!